Antermëia (1515 m s.l.m.)

Te n documënt dl ann 1263 pon por le pröm iade lí l'inom "Undermoy" y te n scrit dl 1482 ince l'inom "Antermoja"; tl 1883 comparëscel por le pröm iade la forma ladina "Antermeja".

Le paisc d'Antermëia se desleria fora a pe de Pütia danter pra y bosc y é aprijé por süa bela contrada da munt, dantadöt por le raiun incër Börz al ingres dl Parch natural Pöz-Odles. Antermëia é ince conesciü por la tradiziun di bagns da paur de Valdander. La fontana d'ega minerala vëgn fora danter peres da cialc dla formaziun de Bellerophon y é buna por curé maraties desvalies. Ti ultimi agn él nasciü sö insom le paisc n pice raiun artejanal y chësc s'integrëia bun tl tesciü sozio-economich dl post.

Antermëia á ince na tlera vocaziun por le turism, sides por chël da d'isté co ince por chël da d'invern. Le paisc é tl ultim tëmp dassënn chersciü, cis tl zënter él gnü fabriché pormez dassënn y chësc é n sëgn de svilup y de progres.