N clima adaté al dagní 

Le comun de San Martin de Tor adotëia n plann por le clima 

Tl  team por le clima, rapresentanc dl comun de San Martin de Tor, rapresentanc de deplü seturs y zitadins interessá laora da apresciapüch dui agn incá sön sciöche le Comun de San Martin pó deventé neutral dal punt d’odüda dl clima y se adaté al miu ales conseguënzes dl mudamënt climatich. 

Dan apresciapüch dui agn á düc i comuns dla Val de Puster tut la dezijiun da lauré fora planns climatics tl ambit dl proiet Klima.Energie.Region Val de Puster, o KER. I planns vëgn sostignis dala comunité comprensoriala y dal grup d’aziun locala dla Val de Puster (Regionalmanagement Pustertal). Le resultat final é n travert ambizius: ester neutrals dal punt d’odüda dl clima anter le 2040 y mëte a jí mosöres adatades por afronté les conseguënzes dl mudamënt dl clima. 

“Le team por le clima á analisé la situaziun atuala y á valuté avisa ci provedimënc che pó gní adorá tl comun de San Martin de Tor. Le plann dl clima n’é porchël nia n produt standard, mo na soluziun personalisada por nosc comun“, dij l’ombolt Giorgio Costabiei. Irene Unterkofler dl GAL Val de Puster s’á dé jö cun le prozes y é contënta cun i resultac. „I planns dl clima é n stromënt dinamich che dëida i comuns da smendrí i consums energetics, da adoré l’energia te na manira plü efiziënta, da adoré deplü fontanes de energia renovables y da s’adaté ales conseguënzes dl mudamënt climatich“, dij Unterkofler. 

N “plann d'aziun” zentral 

I frabicac publics, les strotöres y le parch veicui é gnüs ejaminá dal team. Ci emisciuns de CO2 gaujëii pa? Tan de eletrizité, gasöre o öre de scialdamënt él pa debojëgn? Te ci mosöra pó pa le consum energetich gní curí dales energies renovables? Chëstes y d’atres domandes é la basa dl “plann d’aziun”, la pert zentrala dl plann söl clima. 

Por passé dala reflesciun deboriada al'aziun, él ince gnü metü jö ci mosöres che an mëss mëte a jí anter can y che che é responsabl. Chësc é particolarmënter important y de ütl por les ativités che vëgn do y por le monitoraje. 

Plann climatich aprové dal Consëi de Comun 

Do na discusciun approfondida tla sënta dl Consëi de Comun dl Comun de San Martin de Tor ai 7 de novëmber 2024 él gnü aprové al'unanimité le plann por le clima. 

I pröms proiec concrec tl comun da San Martin é gnüs metüs da jí o é bele tl laur da gní atuá. Danter chisc: Instalaziun de 4 implanc fotovoltaics nüs sön frabicac dl comun; bilanz idraulich tl frabicat comunal y control dl consum de eletrizité y de combustibils (cina ciamó) fossii. 

„Tl workshop y ti sondaji unse porvé da mëte adöm le plü ch'ara vá les propostes di zitadins de nosta comunité y da ne passé nia ma »surafora«. I sperun da avëi dé n contribut significatif, nia ma por le clima, mo ince por la comunité“, dij la responsabla dl team dl clima Sara Clara. 

Chiló podëise ciafé le plann dl clima de nosc comun