L’ALCOL PÓ ESTER BUN... da fá de bi dagns!

Bele tl 2022 él gnü presenté i resultac dl’analisa RAR, fata dal Forum Prävention sön inciaria di Comuns dla Val Badia, sura le consum de alcol da pert di jogn te nosta valada. 

Deplü é stades dedô les incuntades dl grup de laur, de chël che cotan d’istituziuns fej pert: le Sorvisc ai Jogn Val Badia, le Raiun Sozial, l’Intendënza ladina y les scores, i comuns y i Consëis de formaziun de San Martin de Tor, La Val y Badia. Tl passé él gnü organisé referac y workshops sön la tematica dla sensibilisaziun por n consum de alcol cun mosöra danter i jogn y nia ma. 

Da plü o manco n ann incá se dá jö le grup de laur cun la realisaziun de n video dla dorada de ca. 17 menüc te 3 lingac. Por chësc proiet él gnü trat ite porsones, en pert ince dla Val Badia, che é stades bunes da superé na dependënza dal alcol, familiars de dependënc y ince profescionisć tl ciamp dla terapia, por cunté süa esperiënza. L'autur dl video, Manfred Feichter da Mühlen, s’á lascé tomé ite deplü pinsiers te döes perts, che ó fá ponsé sura. 

La pröma pert é formulada te na maniera positiva, olache an podess forsc miné che l’alcol fejes bun y la secunda pert completëia spo le pinsier injuntan na verité manco plajora. Danter chisc pinsiers ite él sté bun da porté ite esperiënzes de vita che dess daidé sensibilisé döta la jënt. Gonot ne se rëndon nia cunt, tan de ciamps dla vita da vigni de che vëgn influenzá da na dependënza, sciöche chëra dal alcol. Al ne é nia ma la vita de “chël/chëra che bër", mo ince dla familia, dl laur, de döta la sozieté. 

Le contignü vá ciamó plü sot, canche an alda i aturs che baia ince ladin y fej insciö realisé ciamó deplü che la problematica é ince da ciafé te nosta valada y nia ma te d’atri posć. 

Le film vëgn metü a desposiziun dles scores por proiec de prevenziun, a uniuns, a comuns, a istituziuns nia ma dla valada mo ince da foradecá. Ince vigni porsona á l’ocajiun da ti ciaré al film. Le codesc QR por ti ciaré gnará publiché sön chertes de sensibilisaziun, che gnará partides fora tla Val Badia. 

Implü él gnü fat dl film ince na verjiun plü cörta te 3 lingac che gnará mostrada tles ferates de Südtirol.

Le video é da ciafé sot a chësc link:

https://www.micura.it/la/sorvisc-online/mediateca-schema?view=article&id=674:sensibilisaziun-alcol&catid=2:uncategorised

07/02/2025